சிந்தனை மாய்த்து விடு!

வானம் பார்த்திருப்பதில் அயர்வே இல்லை.
பசி இல்லை, தாகமும் இல்லை.
மேகம் தாண்டிப் போகும்;
கூடிப் போகும்,பிரிந்தும் போகும்.
மேகம் காணா நேரங்களில்,
கண் மயக்கும் தாரகைகள்.
'என்ன தான் பார்க்கிறாய்?'
எனக்கே தெரியாது.
மொழி தாண்டிய மௌனம்;
எண்ணங்களில் சிறைப்படாமல்
யோகத்தில் இறுத்தி வைக்கும்
யுகாந்திர ரகசியங்கள்.

என்னை வந்து மோதிப்பாரேன்
என்று ஊன்றி நின்ற கால்களை
ஆர்ப்பரித்து மோதிப் போகும் கடலலைகள்....
சுட்டுத்தான் பாரேன் என்று
நீட்டிய ஊனைச் சிதைக்கும் தீநுனிகள்....
இவை எதிலும் இல்லாமல்,
நீலவானில் மட்டும் மோகம்.